अखंड कोकण रेल्वे प्रवासी सेवा समिती - महाराष्ट्र
कोकणवासियांचा जनआक्रोश..! मग तो महामार्गाचा असो की रेल्वे टर्मिनसचा..!! तो ही स्वातंत्र्य दिनी..!!!
अखंड कोकण रेल्वे प्रवासी सेवा समिती सलग्न संघटनांकडून माणगाव आणि सावंतवाडी येथे आयोजन.
येणाऱ्या स्वतंत्र दिनी कोकणवासिय आपल्यावर होत असणाऱ्या अन्यायाला वाचा फोडणार आहेत.
वास्तविक बघता कोकणा सारखा निसर्गरम्य परिसर, इथले समुद्र किनारे, येथील धार्मिक स्थळे ही देशात प्रसिद्ध आहे, त्यातच कोकणातील सिंधुदुर्ग जिल्हा हा पर्यटन जिल्हा. पण इथले पर्यटन बहरावे असे राज्यकर्त्यांना वाटत नसावे कारण पर्यटनाचा मुख्य गाभा हा दळणवळण आहे. त्यातच महामार्ग आणि रेल्वे हे दोन्ही कोकणातील दळणवळणाची मुख्य साधने.
सध्याची वास्तविकता बघता, मुंबई गोवा महामार्ग हा रत्नागिरी आणि रायगड येथे रखडला आहे. गेली १४ वर्ष हा महामार्ग ह्या नाहीतर त्या कारणाने रखडला आहे. त्यासाठी मुंबई गोवा महामार्ग जन आक्रोश समितीच्या माध्यमातून माणगाव येथे तिरंगा रॅली आणि आमरण उपोषण आयोजित केले आहे.
तसेच, कोकण रेल्वे महामंडळ हे भारतीय रेल्वेचा भाग नसल्याने कोकणवासियांना त्याचा त्रास अधिकाधिक जाणवत आहे. कोकण रेल्वेच्या एकेरी मार्गामुळे गाड्या चालवण्याचा क्षमतेवर नक्कीच बंधने आहेत. फक्त कोकणापुर्ती गाड्या चालवणे हे ही कोकणवासियांची मागणी गेली अनेक वर्षे परिपूर्ण टर्मिनस अभावी पूर्ण करण्यात आली नाही.
त्यामुळे कोकण रेल्वे प्रवासी संघटना, सावंतवाडी तर्फे कोकण रेल्वेचे विलीनीकरण, दुहेरिकरण, आणि परिपूर्ण सावंतवाडी टर्मिनस साठी घंटानाद आंदोलन सावंतवाडी रेल्वे स्थानकात करण्यात येत आहे.